វិជ្ជាមេផ្ទះ ៖ ថ្ងៃនេះក្រុមការងាររបស់អង្គភាព E-Arts សូមលើកយកវិធីធ្វើម្ហូបខាត់ណាទឹកភ្នែក ដែលត្រូវការគ្រឿងផ្សំ និងវិធីធ្វើដូចខាងក្រោម៖

គ្រឿងផ្សំ៖
- សាច់គោ ដើមខាត់ណា ទឹកត្រីបុករសជាតិកោះកុង ខ្ទឹមស ខ្ទឹមក្រហម ខ្ទឹមបារាំងក្រហម គល់ខ្ទឹម ម្ទេស
- ស្ករស អំបិល ទឹកត្រី និង ក្រូចឆ្មារ។
វិធីធ្វើ៖
១- វិធីចម្អិនងាយៗ តម្រូវឲ្យយកសាច់គោទៅហាន់ស្ដើងៗល្មម ហើយត្រឡប់លើខ្ទះមួយភ្លែតកុំឲ្យឆ្អិន។ ខ្ទឹមសខ្ទឹមក្រហមនិងខ្ទឹមបារាំងក្រហមត្រូវហាន់ជាចំណិត ស្ដើងៗហើយច្របល់ជាមួយចំណិតសាច់គោនោះ។
២- រីឯខាត់ណាវិញគឺយកវាមក សក យកតែគល់និងស្លឹកល្អៗមុននឹងយកវាទៅស្រុសទឹកក្តៅឲ្យឆ្អិនបន្តិច។ 
៣- ដើម្បីរក្សាពណ៌បៃតងល្អអ្នកអាចយកវាទៅត្រាំទឹកកក ភ្លាមៗក្រោយពីស្រុសរួច។ 
៤- ខាត់ណា ដែលស្រុសរួចត្រូវរៀបដាក់ចានហើយបន្តុបចំណិតសាច់គោរាយពីលើ។ 
៥- រីឯគល់ខ្ទឹមត្រូវហានប្រវែង៣ថ្នាំងដៃរួចសាប់ចុងៗទាំងសងខាងយកទៅត្រាំទឹកឲ្យវារីកសាយដូចផ្កា៕